Mañá mércores 16 de maio ás 21.00 no Círculo Mercantil e Industrial-Unidade de Fene terá lugar a presentación do libro Fase de trema, de Lorena Souto, gañador da XIV edición do Premio Nacional de Poesía Xosemaría Pérez Parallé. Agardámosvos!
Mentres agardamos pola próxima presentación do libro gañador da XXIV edición do Premio Pérez Parallé, Fase de trema de Lorena Souto, chéganos estoutra nova editorial: Mario Regueira, gañador da XVIII edición do Premio, vén de publicar un novo libro de poemas: O silencio, en Edicións Xerais.
Celebramos esta nova que vén a confirmar o que falabamos del na entrada anterior.
Mario Regueira, gañador da XVIII edición do Premio, contesta as preguntas de Ramón Vilar en “Letra en Obras”.
Pódese ver a entrevista aquí.
Mario está estes días presentando a súa última novela, Outono aquí, publicada por Sotelo Blanco, coa que obtivo en 2011 o Premio Manuel Lueiro Rei de novela curta. É a segunda que publica, despois de L’affiche rouge (Xerais, 2007).
A maiores do libro co que gañou o Pérez Parallé en 2005, tamén publicou outro poemario, Blues da crecente, que obtivo o Premio Johán Carballeira en 2008 e foi publicado por Espiral Maior en 2009.
O grupo Alea de análise poética, responsable do portal poesiagalega.org publica o número 1 da súa Revista de Poesía no que se inclúe unha entrevista a Xiana Arias, gañadora da XIX edición do Premio Nacional de Poesía Xosemaría Pérez Parallé.
A revista pódese descargar en PDF facendo clic aquí.
Letra en Obras publica hoxe unha entrevista a Lorena Souto, gañadora da última edición do Pérez Párallé.
Esta tarde reuniuse en Fene o xurado da XXIV edición do Premio. Estivo conformado por Rosa Aneiros, Andrea Nunes e Marica Campo.
Tras a deliberación, decidiron por unanimidade escoller a obra titulada Fase de trema. Aberta a plica, a obra resultou ser da autoría de Lorena Souto, licenciada en Filoloxía pola Universidade de Santiago, membro do consello de redacción da revista Dorna que obtén, con este premio, o primeiro galardón da súa esperamos que longa carreira literaria.
Lorena naceu no Páramo en 1983 e reside en Compostela.
Continúa aberto o prazo para presentar orixinais para a XXIV edición do Premio Nacional de Poesía Xosemaría Pérez Parallé para autores e autoras sen obra individual publicada. Cómpre enviar 3 copias dun libro de poemas ao enderezo do Círculo Mercantil e Industrial-Unidade de Fene: Porto do Rio, 21 – San Paio-Fene (A Coruña) antes do 30 de setembro. O libro premiado publícase na colección de poesía Espiral Maior e o autor ou autora galardoada recibe, asemade, unha peza do escultor Francisco Pérez Porto, fillo de Xosemaría Pérez Parallé. Pódense consultar aquí as bases e aquí a listaxe de gañadores e gañadoras das edicións anteriores.
O pasado sábado María Rosendo recibiu de mans de Iván Puentes, alcalde de Fene, a figuriña deseñada polo ceramista Francisco Pérez Porto, fillo de Xosemaría Pérez Parallé, e que representa a obtención da XXIII edición do Premio.
Foi no medio dun acto no Círculo Mercantil e Industrial-Unidade que contou coa presenza de Antía Otero, membro do xurado desta edición. Presentou o acto Enrique Sanfiz e presidiuno Manuel Romero Rey, Presidente do Círculo.
Nómade, o libro merecedor do Premio deste ano, sairá publicado dentro duns meses na colección de poesía Espiral Maior que dirixe o poeta Miguel-Anxo Fernán Vello.
O pasado venres reuniuse na sede do Círculo Mercantil e Industrial-Unidade, o xurado da XXIII edición do Premio Nacional de Poesía Xosemaría Pérez Parallé. Desta volta estivo integrado por Pedro Casteleiro, Antía Otero e Ramón Neto.
Despois da discusión, resultou escollido o libro titulado Nómade
, presentado baixo o pseudónimo “Verdecente”. Aberta a plica, resultou ser da autoría de María Rosendo Priego.
Nada en Vigo en 1984, María escribe poesía desde os 17 anos. Realizou estudos de filoloxía inglesa que, máis tarde, compaxinará cos de educación social.
En 2007 viaxa a cidade de Bos Aires para vivir no hemisferio austral durante un ano. Será precisamente nesta andaina onde comeza a nacer a poética deste poemario, Nómade.
Participou en recitais poéticos coas Redes Escarlata ou na II “Rebelión da décima musa”, nas festas do Barrio de San Pedro en Compostela. Non ten ningún texto publicado.
Nómade é, tal como se indica nas bases do premio, o primeiro libro da autora que verá luz, e será daquí a uns poucos meses na colección de poesía Espiral Maior.
Na actualidade María Rosendo vive en Compostela onde traballa en produción teatral coa compañía Berrobambán.
actualizado 03/11/2010 12:06
en radiofusión.
no diario de ferrol.
en culturagalega.org.
en galicia-hoxe inclúen unha entrevista con maría.
en fene.com.
