Presentación de A tarde. O desacougo.

O próximo sábado 11 ás 21h na sede do Círculo Mercantil e Industrial-Unidade, en Fene, terá lugar a presentación do libro A tarde. O desacougo., de Amauta Castro, gañador da XXXI edición do Premio Nacional de Poesía Xosemaría Pérez Parallé.

Participarán do acto, ademais do autor, a Presidenta do CMI, Paula Romero, o alcalde de Fene, Gumersindo Galego e o editor do libro, Miguel Anxo Fernán-Vello.

Pecharase a velada coa actuación de Sanjurjo e Dopico.

Amauta Castro obtén o XXXI Premio Pérez Parallé

Amauta Castro (pseudónimo literario de Rafael X. Muñoz Castro), nado en Euskadi en 1981, obtivo a XXXI edición do Premio Nacional de Poesía Xosemaría Pérez Parallé, que convoca o Círculo Mercantil e Industrial-Unidade de Fene, co apoio do Concello de Fene.

O xurado escolleu o libro de Amauta Castro, titulado A tarde. O desacougo de entre 34 obras presentadas a concurso este ano.

O autor galardoado é poeta e tradutor. Di que naceu en Euskadi por accidente, fillo dunha galega e un andaluz emigrados na marxe esquerda do Nervión. Criouse en Vigo pero, en 2004 emigra por razóns de traballo a Salt (Girona) onde actualmente reside. Participou en diversas publicacións colectivas e antoloxías como Dorna, Antoloxía Poética da Diáspora Galega, Andar21, O Ollo Público, O poliedro da soidade ou a Revista Ligeia. Ten colaborado co suplemento “Altermundo” de Galicia Hoxe. Levou a súa voz a diversos festivais e acción poéticas coma o “X Festival de Poesía a les Caves” (Sant Sadurní d’Anoia) e o “Proxecto Catalitzador 2013” (Barcelona). En 2017 resultou gañador do XXXI Certame de Poesía Rosalía de Castro.

A entrega do premio terá lugar o próximo sábado 17 de novembro ás 20h na sede do Círculo Mercantil e Industrial-Unidade en Fene.

O xurado desta edición estivo integrado por Manuel Forcadela, Berta Dávila e Míriam Ferradáns.

Parallé 2018

Xa está aberto o prazo para presentar obras á XXXI edición do Premio Nacional de Poesía Xosemaría Pérez Parallé, convocado polo Círculo Mercantil e Industrial-Unidade, de Fene, coa colaboración do Concello de Fene e a editorial Espiral Maior.
Pódense consultar as bases na web do Premio ou descargar en formato PDF.
Para participar abonda con enviar por correo electrónico o libro en formato PDF acompañado da plica (en PDF aparte).
O prazo de presentación remata o venres 14 de setembro de 2018.
O libro gañador darase a coñecer nos primeiros días do mes de novembro deste ano.

O XXX Premio Pérez Parallé, para Carlos Lixó

O pasado 11 de novembro reuniuse o xurado da XXX edición do Premio Nacional de Poesía Xosemaría Pérez Parallé. Estivo integrado por Chus Nogueira (ensaísta e Presidenta da Asociación Galega da Crítica), María Lado (poeta de Cee, autora dunha importante obra e moi coñecida pola súa faceta como recitadora) e Jesús Castro Yáñez (gañador do Premio en 2015).
De entre as 61 obras presentadas, e tras unha pormenorizada discusión, escolleron por unanimidade a obra presentada baixo o título murallas de pedra sen cemento que duran para sempre. Unha vez aberta a plica, o libro resultou ser da autoría de Carlos Lixó Gómez.

O gañador naceu en Carreira (Ribeira) e é graduado en Historia. Actualmente está preparando a tese de doutoramento en Historia Medieval. Obtivo dúas veces o premio de relatos curtos do Concello de Cambre e o terceiro premio de relatos curtos do Concello de Ames. Algún poema seu foi publicado na revista Dorna. É colaborador de opinión no xornal dixital Sermos Galiza.

Foto: Concello de Fene

O acto de entrega tivo lugar o sábado 18, na sede do Círculo Mercantil e Industrial-Unidade. Fixeron entrega do premio a presidenta do CMI, Paula Romero, e o alcalde de Fene, Juventino Trigo.

No acto participaron tamén nenos e nenas dos colexios públicos O Ramo, de Barallobre, e Os Casais, de Maniños. Entre todos, leron un traballo que prepararan sobre a vida de Xosemaría Pérez Parallé e mais recitaron algúns dos seus poemas.

Pechou o acto, como é habitual, a Rondalla Estrelecer, dirixida por Javier Amado.

O libro de Carlos Lixó será publicado por Espiral Maior. O acto de presentación está previsto para o mes de maio do próximo ano.

Un libro que vai lonxe

Nomes de fume, o libro co que Míriam Ferradáns obtivo a XXIX edición do Premio Pérez Parallé, está a acadar unha grande repercusión na prensa especializada e nos lectores.

Onte, o taboleiro do libro galego, situábao no primeiro posto dos libros de poesía máis vendidos en xuño, por diante de Marta Dacosta, Lupe Gómez e mais o derradeiro libro de Fran Cortegoso.

Ao longo deste mes, interesantes recensións foron publicadas en diversos blogs e publicacións periódicas:
– O crítico Ramón Nicolás, no seu blog “Caderno da crítica”
– Chus Nogueira, na súa columna semanal de libros no “Diario cultural” da Radio Galega
– Ramón Rozas, no seu blog homónimo e no Diario de Pontevedra
– Mario Regueira publicou unha recensión no xornal Sermos Galiza. Velaquí unha foto (pódese ver ampliada facendo clic)

– O crítico Armando Requeixo dixo no Zig Zag Diario da TVG que quería falar do libro de Míriam (ver aquí). Afinal non lle deu tempo.
– E n’A Revista da Fin de Semana, tamén na TVG, Ramón Nicolás incluíu o libro entre as súas recomendacións para o verán e o libro estivo aí na mesa durante a entrevista

Hai uns días acompañabamos a Míriam na presentación do libro na súa terra nunha sala ateigada de xente de Bueu. Estamos moi orgullosos do éxito que está a acadar o libro e dámoslle os nosos parabéns a Míriam e o noso agradecemento por levar por Galicia adiante o nome do noso Premio.

Convocada a XXX edición do Premio


Xa está aberta a convocatoria da XXX edición do Premio Nacional de Poesía Xosemaría Pérez Parallé. Esta edición é moi especial: 30 anos van xa da convocatoria deste certame que, desde 2005, premia a obra dun autor ou autora inédita en lingua galega.
Como grande novidade nesta convocatoria, xa non será necesario enviar varios exemplares encadernados da obra: para poder participar do premio deberá enviarse o libro en formato PDF do xeito que se indica nas bases.
O prazo de presentación de orixinais rematará o 15 de setembro.
Podedes consultar as bases aquí ou descargalas en formato PDF facendo clic aquí.

Se tendes algunha dúbida sobre o proceso de presentación de orixinais, podedes enviar as consultas a ese mesmo enderezo de correo ou comunicarte a través do noso perfil de Facebook.

Presentación de “Nomes de fume”

Onte, no Círculo Mercantil e Industrial-Unidade, en Fene, encontrámonos novamente. Foi para presentar en sociedade o libro gañador do Premio do ano pasado: Nomes de fume, de Míriam Ferradáns.

O acto contou, como é habitual, coa presenza do alcalde de Fene, Juventino Trigo e do editor do libro, Miguel Anxo Fernán Vello.

O libro apadriñouno o poeta Ismael Ramos quen contou cal era a súa relación con Míriam, co libro e mais co premio nunha intervención na que se gañou o cariño de todas as persoas presentes. Hoxe aparece nas fotos da tarima do CMI. O salón non o coñecía pero, como dixo el mesmo, a tarima coñecíaa ben polas fotos do Facebook dos seus amigos. Esperamos contar con el en futuras edicións do premio.

Míriam agradeceu a moitas persoas pola súa participación no libro, en particular a Dores Tembrás, poeta, editora e autora do prólogo, quen tamén estaba presente no acto. E leu algúns poemas do libro para pechar o acto.

Como todos os anos, foi un encontro bonito e feliz. O Premio Nacional de Poesía Pérez Parallé da un paso máis nesta xa longa andaina e prepárase para iniciar o camiño da XXXª edición que será moi especial, máis, se cabe, do que xa tentamos que sexa cada unha delas.
Moitas grazas ás persoas que nos acompañaron onte, ás que nos acompañan sempre. Seguimos traballando.

Fin do “Ano Ferradáns”

Achegámonos ao remate deste 2016 e queremos deixar aquí constancia da ledicia que nos produce cada novo galardón que está a recibir a nosa autora premiada deste ano.

miriam_ferradans

Cando o xurado abriu a plica correspondente ao libro escollido e apareceu o nome de Míriam Ferradáns, logo soubemos que a autora xa obtivera algúns galardóns: o 3º premio no Xuventude Galicia Crea en 2012, o Rosalía de Castro de Cornellá en 2013 e en 2014. Neste 2016 comezara facéndose co Francisco Añón, do Concello de Outes. Despois chegoulle o XXIX Premio Nacional de Poesía Xosemaría Pérez Parallé pero non parou alí: aos poucos días fíxose público o 2º premio no certame de Cornellá e, esta mesma semana, o Leiras Pulpeiro, do concello de Mondoñedo.

Ela di que non son todos premios dun ano, que levaba moitos anos traballando e só é agora cando se decidiu a saír abertamente cos seus textos ao mundo. Xa que logo, é o recoñecemento a un traballo teimudo e silencioso.

Nós estamos encantados de que ela faga parte da familia do Parallé. E, unha vez máis, recoñecemos a laboura do xurado (Eduard Velasco, Lara Dopazo e Paco Souto) que souberon atopar un libro que ten detrás unha voz que vai tomando, con forza, forma de seu.

Unha boa maneira de rematar este 2016 que será, tamén, o ano de Míriam Ferradáns.

Deixamos aquí a ligazón a unha pequena notiña do Faro de Vigo no que se recolle toda esta información.

 

O Parallé de Míriam Ferradáns

Hai uns días tivo lugar na sede do CMI a entrega do XXIX Premio Pérez Parallé a Míriam Ferradáns. Como todos os anos, participaron do acto a presidenta do Círculo, Paula Romero e o alcalde de Fene, Juventino Trigo. Lara Dopazo interveu para explicar algunhas das motivacións do xurado, do que formou parte xunto co poeta e editor Paco Souto e Eduard Velasco, gañador da edición de 2014.
A ocasión de entregarlle o premio a Míriam valeu tamén para lembrar a Fran Cortegoso, gañador do premio en 2013, recentemente falecido. Eduardo Estévez, coordinador do certame, abriu cun poema seu e, a continuación, todas e cada unha das persoas que interviron tiveron unha especial mención a Fran quen se convertiu así, dalgún xeito, en protagonista do acto.
O libro de Míriam Ferradáns será publicado o próximo ano na colección de poesía Espiral Maior que dirixe o poeta Miguel Anxo Fernán Vello.
Velaquí unhas poucas fotos desa noite.

mesa

entrega

lara

miriam

presidenta

Adeus, Fran

A familia do Premio Nacional de Poesía Xosemaría Pérez Parallé perdeu esta semana un dos seus membros moi queirdos: o pasado 5 de outubro, á idade de 31 anos, morreu na súa casa de Bora, Pontevedra, o poeta Fran Cortegoso, gañador en 2013 da XXVI edición do Premio, co seu libro Memorial e danza.
Velaquí a primeira foto súa que puxemos neste blog cando se lle concedeu o Premio:
FranCortegoso-174x300
A tempo de que Fran puidese vela, chegou a edición do seu poemario Suicidas. Foi publicado por Chan da Pólvora, selo editorial creado por algúns dos seus amigos máis queridos: Antón Lopo (quen lle presentara o libro no Círculo Mercantil en 2014), Alicia Fernández (quen recollera en 2013, xunto con Gonzalo Hermo, o Premio que Fran non puido recoller porque estaba daquela en Francia) e Eduard Velasco (gañador do Premio Pérez Parallé en 2014).
Aquí, unha foto de Alicia e Gonzalo recollendo o premio de Fran. Levaban para a ocasión unhas camisetas coa cara del.
gonzalo_01
E unha do día da presentación do libro (xunto con Antón Lopo, Miguel Anxo Fernán Vello, e os daquela Presidente do Círculo e Alcalde de Fene, José Manuel Romero e Gumersindo Gallego:
presentacion-fran-5
A pesar de que a súa foi unha carreira literaria fugaz, en moi pouco tempo Fran acadara o recoñecemento unánime de lectores, críticos e compañeiros e compañeiras de andaina. A poeta Chus Pato dicía del que era “o maior poeta galego vivo”: sen dubidalo, a obra de Fran Cortegoso, vencellada definitivamente ao noso Premio, resoará no tempo.

Moitas foron e seguen a ser as mostras de cariño e respecto que desde diferentes lugares están a renderse estes días ao poeta. Estas son algunhas:
Especial no Diario Cultural da Radio Galega
A emocionada homenaxe do poeta Antón Lopo
A nota publicada polo Concello de Fene

Volvemos a ligar aquí unha nota que, sobre o libro premiado no Parallé, publicara Gonzalo Hermo

O portal poesiagalega.org difunde o PDF dos primeiros poemas de Fran que viron luz no suplemento “Revista das Letras” do xornal “El Correo Gallego”.

Por último, a foto do escaparate da libraría Chan da Pólvora, homenaxe ao poeta, con todos os exemplares do seu libro Suicidas.

chan_fran

Estará sempre na nosa memoria e no noso cariño. E irá sempre ao noso carón nesta viaxe ilusionante do Premio Nacional de Poesía Xosemaría Pérez Parallé que, entre outras virtudes, trouxo ás nosas vidas a xente inesquecíbel como Fran Cortegoso.